બુલેટપ્રુફ કાચ કેવી રીતે બને?

કાચ નાજુક અને બરડ વસ્તુ છે. મોટો અવાજ કે ધડાકો થાય તો પણ તેમાં તિરાડો પડી જાય. વૈજ્ઞાનિકોએ થોડા મજબૂત કાચ પણ વિકસાવ્યા છે. ટ્રક અને મોટાં વાહનોના કાચમાં બે કાચના પડ વચ્ચે પારદર્શક રબરનું પડ ચોંટાડેલું હોય છે એટલે તે કાચ તિરાડ પડે તો પણ તૂટી પડતાં નથી. પરંતુ બુલેટપ્રુફ કાચ તો નવાઈની વાત કહેવાય.
બંદુકમાંથી છોડાયેલી ધસમસતી બુલેટ કાચ સાથ અથડાય ત્યારે શું થાય છે તે જાણવું પડે. તમે ક્રિકેટ રમતા હશો. સામેથી આવતાં બોલને કેચ કરતી વખતે બે હાથ વડે બોલને રોકો છો. બોલમાં ગતિશક્તિ રહેલી છે તે શક્તિ તમારા હાથમાં ટ્રાન્સફર થાય છે અને બોલ રોકાય છે. પરંતુ આ ગતિ શક્તિ હાથને નુકસાન પણ કરી શકે. હાથમાં જાડા ગ્લોવ્ઝ આ શક્તિની અસર ઘટાડે છે પરંતુ સાથે બોલ કેચ કરતી વખતે હાથને એકાદ ઈચ પાછળ પણ ખેેંચે છે કે જેથી બોલની ગતિશક્તિ ઘટી જાય.
કાચ સાથે ગોળી અથડાય ત્યારે ગોળીની તીવ્ર ગતિશક્તિ કાચમાં પ્રવેશે છે. ગોળીની ઝડપ ઘટે અને તે કાચ તોડીને આગળ વધે. કાચ આ ગતિશક્તિને ગ્રહણ કરી શકતો નથી એટલે તૂટી જાય છે. વિજ્ઞાાનીઓએ ગતિશક્તિનું શોષણ કરી લે તેવા કાચ બનાવ્યા છે. જેમાં કાચના અનેક પડ વચ્ચે પોલીકાર્બોનેટના પારદર્શક પડ હોય છે. આ પડને લેમિનેટ કહે છે. ત્રણ ચાર કાચના પડ વચ્ચે ત્રણ ચાર પોલિકાર્બોનેટના પડ જોડાઈને બુલેટ પ્રુફ કાચ બને છે. બુલેટ આ કાચ સાથે અથડાય ત્યારે તેના આઘાત તેમજ ગતિશક્તિ પોલિકાર્બોનેટના કાચમાં એક સ્થાને કેન્દ્રિત ન થતાં ચારે તરફ વિખેરાઈ જાય છે.
બુલેટપ્રુફ કાચ ૩થી ૪ સેન્ટીમીટર જાડા હોય છે. મહાનુભાવોની કારો, બેંકો અને અન્ય સલામતીની જરૃરિયાતવાળા સ્થળે બુલેટપ્રુફ કાચનો ઉપયોગ થાય છે.